Здружението на јавните обвинители во целост го поддржува денешното излагање на Јавниот обвинител на РСМ Љупчо Коцевски, кој денеска на почетокот на расправата за предлог-буџетот за 2026 година, пред пратениците од собраниската Комисија за финансирање и буџет алармираше за состојбата со која се соочуваат обвинителствата, во кои недостигаат финансиски средства, но и кадар. Здружението на јавните обвинители исто така уште на 23 септември писмено реагираше за недоволните средства кои се издвојуваат во буџетот за потребите на обвинителството.

Новиот предлог-закон за јавното обвинителство предвидува вкупниот буџет на институцијата да изнесува 0,5% од државниот буџет, а не од бруто домашниот производ. Тие средства се наменети не само за платите на јавните обвинители, туку за целокупните трошоци на јавните обвинителства во државава.

Здружението на јавните обвинители најостро реагира на недоличните и неаргументирани изјави на одредени политичари со кои директно се загрозува интегритетот и самостојноста на Јавното обвинителство и на правосудните институции воопшто.